Atu hatene lalalok servisu Sekretariadu Tekniku Administrasaun Eleitoral ( STAE ) no oinsa organiza aktu eleitoral iha Timor-Leste, nune’e iha loron 25 fulan Juñu 2015, Ministru Justisa Saõ Tome e Principiu, Sr. Roberto Pedro Raposo, ho ninia komitiva hamutuk ho reprezentante Ministeriu Justisa Cabo Verde, hala’o visita kortejia mai iha sede STAE Nasional nebe’e simu direitamente husi  Diretor jeral STAE, Sr. Acilino Manuel Branco, ho ninia funsionarius sira.

 

Objetivu husi visita ida ne’e hodi hametin nafatin lasus amizade husi nasaun São Tome e Principiu, Cabo Verde ho Timor Leste nebe’e hanesan mos membru husi Comunidade Pais Lingua Portugues (CPLP), liu-liu iha area koperasaun eleitoral nian. Iha visita ne’e  Ministro Justisa Saõ Tome Principiu ho ninia komitiva  nebe’e akompaña husi Vise Ministro MAE, Sr. Tomas do Rosario Cabral, hala’o visita ba Servidor base dadus eleitoral sentral STAE ninian nebe’e hanesan fatin ba rai dadus eleitores Timor-Leste tomak, iha biban ne’e mos komitiva sira hetan esplikasaun husi Vice Ministru MAE kona-ba koperasaun eleitoral ho parseiru sira ba prosesu eleitoral iha Timor-Leste no oinsa kontribuisaun Timor-Leste ba desenvolvimentu area eleitoral iha pais sira seluk . Alein ne’e mos komitiva sira hetan esplikasaun prosesu eleisaun Timor-leste nian, liu-liu iha eleisaun jeral 2012 husi no prosesu resenseamentu eleitoral iha Timor-Leste no oinsa halo sinkronizasaun dadus eleitoral husi base ba servidor sentral husi Diretur Jeral STAE no Xefe seksaun Base Dadus, Atual Adjunta Diretur Jeral Sra. Tulia Onoriana.