Dili-S.E. Vise Ministru Administrasaun Estatál Sr. Tomas Cabral, hateten katak eleisaun sei la’o tuir kalendáriu ne’ebé konsellu ministru dekreta tiha ona. “Ministru MAE no Primeiru Ministru iha kometimentu hanesan atu ezekuta eleisaun ne’e tuir lei suku Nu 9/2016 no kalendáriu ne’ebé governu dekreta no publika ona iha jornál da repúblika”.


Iha enkontru koordenasaun ne’ebé partisipa husi Prezidente CNE Sr. Alcino Barris ho komisáriu sira, Diretór jerál desentralizasaun administrative Abílio José Caetano, koordenadór STAE Munisípiu sira no mós kargu xefia husi MAE ne’ebé hala’o iha salaun enkontru STAE Nasional Caicoli Dili (05/09/16), ho objetivu importante atu fahe informasaun ba CNE no STAE konaba desentralizasaun administrative no espesialmente kona-ba eleisaun suku ne’ebé simultaniamente sei hala’o iha loron 30 Setembru 2016 iha territóriu Timor-Leste laran tomak.

Diretór Jerál STAE Sr. Acilino Manuel Branco ne’ebé lidera sorumutu ne’e hateten, Entidade sira ne’ebé partisipa iha sorumutu ne’e hakarak hatene preparativus DNAS,STAE no Ministériu administrasaun estatál nian kona-ba realizasaun eleisaun suku .“Lei promulga no Kalendáriu governu dekreta ona, ita tenke nakloke ba malu saida mak ita prepara ona no saida mak seidauk prepara kona-ba eleisaun suku, tanba informasaun ne’ebé espalla iha rai laran katak autoridade lokál seidauk hetan informasaun kle’an kona-ba eleisaun suku tanba ita seidauk halo sosializasaun lei suku, enkontru ida nee simples maibé tenke hamosu rezultadu ruma, atu nune ita bele rekomenda ba superior sira hodi foti desizaun ruma kona-ba eleisaun suku”.

Tuir lei suku ( Nú 9/2016. artigu 96) mensiona katak STAE fó apoiu ba eleisaun suku tanba ne’e STAE prepara tiha ona matéria ba publikasaun no mós manual formasaun ne’ebé sei fasilita formadór sira no mós meza eleitorál atu bele iha koñesimentu tékniku hodi organiza eleisaun suku.

Presidente CNE Sr. Alcino Barris apresia ho esplikasaun lei suku no hateten, lei suku ne’e modernu liu maibé tanba kestaun tempu ba preparasaun ba eleisaun suku ne’ebé mínimu bele implika ba rezultadu eleisaun suku, tanba ne’e nia sujere atu hala’o sosializasaun ba autoridade lokál no mós halo publikasaun liu husi meus komunikasaun sosiál atu nune’e eleitór sira bele hatene prosesu votasaun. “ohin ami CNE mai iha ne’e atu rona preparasaun sira, maibé tanba governu dehan tenke hala’o entaun ami motiva ita bo’ot sira atu prepara kondisaun didi’ak hodi ajuda eleisaun ne’e la’o ho susesu” tenik prezidente CNE Sr. Alcino Barris.

Governu liu husi Konsellu Ministru iha tersa feira (16/08/16) dekreta loron atu hala’o sorumutu Asembleia Aldeia nian no Konsellu Suku nian ho ninia objetivu mak atu konstitui meza eleitorál Suku sira nian no atu simu kandidatura ba Xefe Suku ne’ebé sei hala’o iha loron 15 fulan-Setembru.

Sorumutu Asembleia Aldeia nian sira ne’ebé hala’o ho objetivu atu hili delegadu Aldeia nian sira ba Konsellu Suku, nune’e mós Xefe Aldeia sira no Xefe Suku sira sei hala’o iha loron 30 fulan-Setembru.

Depois de apuramentu ikus husi rezultadu eleisaun, Xefe Suku nian sei hala’o sorumutu iha loron 01 fulan-Outubru. Maibé Karik presiza eleisaun Xefe Suku sira nian ba volta daruak, maka sei hala’o iha loron 07 fulan-Outubru , ho apuramentu ikus husi rezultadu sira iha loron 18 fulan-Outubru. Ikusliu, sorumutu Konsellu Suku nian sira atu hili Lian-na’in sira ninian no reprezentante juventude sira iha Konsellu Suku, marka ona ba loron 22 fulan-Outubru.

Forma eleisaun suku bazeia ba lei Nú 9/2016 sei hala’o eleisaun suku ho modu sufrájiu, diretu, sekretu, livre no pesoál. Konsellu suku kompostu husi; xefe suku, xefe aldeia no delegadu no delegada ne’ebé sei hili husi komunidade iha nivel aldeia, enkuantu joven mane ida ho joven feto ida ho idade (17-30) no lia nain ho idade bo’ot liu iha suku ididak sei hi hili liu husi asembleia suku.
# Remata #