Dili-Director geral Secretáriado Técnico da Administração Eleitoral (STAE), Sr. Acilino Manuel Branco, Kuarta-Feira (20 Jullu 2016) hetan visita traballu husi konsultor senior ba eleisaun , Sr. Maximo Zaldivar Calderon husi International Foundation for Electoral Systems ( IFES ) no akompaña husi Sr. Karlito Nunes jestor ba programa International Republican Institute (IRI), iha gabinete diretor jeral STAE ninian.


Durante Sorumutu ne’e Sr. Maximo Zaldivar Calderon fó intrudusaun kona-ba knar IFES iha Timor-Leste no mos hato’o disponibilidade IFES atu fo apoiu edukasaun eleitoral no formasaun ba STAE iha eleisaun suku 2016 no mos eleisaun jeral 2017.


Iha sorumutu ne’e, Sr. Maximo Zaldivar Calderon konvida diretor Jeral STAE atu bele halo observasaun ba iha eleisaun presidensial Estadus Unidus da Amerika (EUA) ne’ebé sei hala’o iha fulan Novembru tinan 2016.


Iha sorin seluk, Director Geral Secretáriado Técnico da Administração Eleitoral (STAE),Sr. Acilino Manuel Branco apresia ho konvite refere no kontente ho komitmentu IFES nian atu apoiu eleisaun Timor-Leste. Parte rua (STAE-IFES) konkorda atu prepara akordu ida hodi bele realiza apoiu IFES nian ba eleisaun Timor-Leste.


#Remata#
Media STAE