IMG 4200Dili – ohin Kinta-feira (14/07/2016) iha salaun STAE Caicoli Dili, Diretor jeral Secretariado Técnico de Administração Eleitoral (STAE) Sr. Acilino Manuel Branco, hala’o sorumutu ho xefi departementu STAE munisipiu 12 inklui mos xefi departementu STAE husi rejiaun Administrativa Espesial Oecusse (RAEO), asesor STAE no funsionariu husi dirasaun Jerál STAE.  Objetivu ba sorumutu ne’e, atu diskute kona-ba planu operasionál ba eleisaun suku ne’ebé sei akontese iha fulan outubru 2016 no resenseamentu eleitoral ba eleisaun jerál 2017.

Iha kontextu eleisaun suku, STAE sei hein publikasaun ba  lei eleisaun suku ne’ebé sei promulga husi prezidente da republika, hodi nune’e bele prepara regulamentu ba eleisaun suku ne’ebé sei difini STAE nia papel ba formasaun no mos apoiu logistiku ba eleisaun suku no aldeia ne’ebé sei akontese iha fulan outubru tinan 2016.

Iha tempu hanesan, STAE mos halo ajustamentu ba atividade no nesisidade operasionál ba  planu orsamentu USD 8 Millaun ba eleisaun jeral 2017 ne’ebé governu kompremitidu tiha ona atu aloka ba eleisaun Jerál.

Xefi departementu STAE Munisipiu sira mos propoin atu bele aumenta tan sentrú votasaun no estasaun de votu iha kada munisipiu tamba hela fatin eleitor nian ba sentrú votasaun dook, la asesu ba elektrisidade no Estrada.

Além de preukupasaun ba kestaun jeografika, númeru eleitor nia sae tiha ona ba ± 726.000  presija sentrú votasaun ne’ebé asesivel atu bele fasilita partisipasaun eleitor nian iha tempu eleisaun.

Molok atu  ensera sorumutu ne’e, adjunta diretór Jerál STAE, Sra. Tulia Onorina Andrade de Jesus realsa, STAE hala’o hela prosesu atualizasaun baze dadus no verifikasaun lista ba eleitor atu nune’e labele prejudika ba total eleitor sira  iha eleisaun jerál 2017.

Sorumutu ne’e rezulta konkordansia ida atu identifika ekipamentu STAE Munisipiu no Nasionál atu nune’e bele ajusta iha planu orsamentu eleisaun suku no aldeia inklui planu orsamentu eleisaun jerál oin mai.

#Remata#

Media STAE